Policia njoftoi sot arrestimin e dy personave të dyshuar si autorë të 4 vrasjeve të ndodhura në Durrës në një hark kohor prej dy muajsh si dhe ka shpallur në kërkim dy të tjerë.
Altin Ndoci 33 vjeç, banues në Tiranë, i dënuar më parë për trafik droge, është një nga personat e arrestuar nga policia. Së bashku me 22-vjeçarin K. A, ai akuzohet për ekzekutimin e vëllezërve Besmir e Viktor Haxhia më 27 prill dhe Dorjan Shkozën e Anxhelo Avdian më 2 mars.
Sipas policisë të dyja ngjarjet kanë lidhje me prishjen e pazareve të drogës dhe kanë ndodhur në të njejtin vend. Drejtori i Policisë, Ardi Veliu tha se mekanizimi i përdorur në të dyja vrasjet është i njëjtë.
Armët e zjarrit të përdorura për të kryer krimin, 3 kallashnikovë, ishin fshehur në një kanal midis Shkozetit dhe Nishtullës, ndërsa në Arapaj u gjet dhe automjeti tip ‘Toyota’ i përdorur nga autorët.
Pazaret e drogës janë në qendër të këtyre ngjarjeve kriminale pasi 2 nga 4 viktimat kanë qenë të dënuar më parë për trafik narkotikësh. Konkretisht Dorjan Shkoza 35 vjeç, që u vra në 2 mars, ka qenë ish i dënuar me 8 vjet burg dhe Besmir Haxhia që u vra në 27 prill, ishte dënuar në Greqi dhe Francë. Një të shkuar të ngjajshme kishte dhe vrasësi Altin Ndoci.
Ky i fundit ka rënë në prangat e policisë si pasojë e bashkëpunimit me drejtësinë të 22-vjeçarit të arrestuar. Targat e makinës së ekzekutorëve rezultuan të vjedhura sipas hetimeve nga një makinë “Skoda”. Kjo e dhënë ka çuar hetuesit në gjurmimin dhe kapjen e 22-vjeçarit i cili pasi është marrë në pyetje ka zbuluar bashkëpunëtorin e tij. /Opinion.al
