Gareth Bale dhe Emma Rhys-Jones, është dashur t’i shtojnë masat e sigurisë, pasi tezja e të fejuarës së tij është arrestuar me akuzën për pastrim parash.
Sipas The Sun, Annabella Williams (55 vjeçe) dhe një mashkull 50 vjeçar janë arrestuar nga policia të shtunën, pas një kontrolli në shtëpinë e një tjetër pjesëtari të familjes së Emmas.
Një çantë që përmbante para, drogë dhe orë të shtrenjta – në vlerë prej një milion funtesh, është gjetur pas kontrollit policor. Mashkulli i arrestuar është liruar me garanci, kurse tezja e të fejuarës së yllit të Real Madridit vazhdon të qëndrojë në mbajtje.
Kujtojmë që shtëpitë dhe disa vetura të familjarëve të Emma Rhys-Jones ishin sulmuar nga një bandë droge me origjinë nga Lindja e Mesme muaj më parë, pasi kushërira e të fejuarës së Bale, Epiphany Dring – një ish modele – është zhdukur me një çantë ku ndodheshin 300.000 funte para të thata, drogë dhe ora të shtrenjta që besohet në total të kenë qenë në vlerë prej një milion funtesh (që duhet te jetë çanta e gjetur nga policia).
“Të gjithë janë më të shqetësuar tash, sepse banda mund të jetë akoma më agresive (pasi çanta është konfiskuar nga policia) dhe njerëzit kanë frikë se mund të vijë më e keqja. Bandat e drogës janë të prira që të vënë drejtësinë sipas tyre dhe nuk ia lënë në dorë policisë”, ka thënë një burim.
Bale është në lidhje me Emman që nga vitet shkollore dhe kanë dy fëmijë bashkë. Familja e të fejuarës së tij ka probleme të vazhdueshme me ligjin.
Baba i saj, Martin Rhys-Jones, është i dënuar me gjashtë vjet burg në SHBA, pas një mashtrimi shumëmilionësh me aksione. 52-vjeçari, pos dënimit, duhet të kthejë edhe 2.2 milionë funte që i ka përfituar nga dhjetëra persona, duke përfshirë edhe një të sëmurë me Alzheimer, nga i cili ka përfituar 300.000 funte.
