Prokurori për Krimet e Rënda ka dërguar dosjen në Gjykatë, për vrasjen e shtetases Lirije Lami. Kjo e fundit u helmua nga nusja e saj, Marjana Cmeta, e cila i hodhi fostoksinë në lëngun e portokallit.
Për moskallëzim krimi akuzohen dhe Agim Lami (bashkëshorti i viktimës), Arben Saliu (kushëriri i Agimit ) dhe Hysen Shehu, hoxha që ka xhiruar rrëfimin e Cmetës.
Ata akuzohen se kanë qenë në dijeni të ngjarjes se ndodhur dhe autorësisë së saj dhe nuk kanë kallëzuar pranë organeve kompetente duke fshehur ngjarjen. Vrasja e Lirije Lamit që ndodhi më 30 prill 2017 në Kamëz, është pranuar me gojën e saj nga nusja 21-vjeçare, Marjana Cmeta.
Hetimet e prokurorisë
Gjashtë ditë pas vrasjes se Lirije Lamit, Marjana Cmeta, asokohë 20 vjeçe shkoi në shtëpinë e Hysen Shehut, i njohur si hoxhë, për t’u rrëfyer tek ai për krimin. Ajo nuk e dinte se hoxha po e regjistronte dhe po e filmonte të gjithë rrëfimin e saj për krimin në familjen Lami.
Ishte nuse për djalë të vetëm Marjana Cmeta dhe me këtë argument e fejuan që 18 vjeçe me mblesëri. Pas një viti Marjana edhe studente për mësuesi, u kthye tek prindërit, atëherë kur në ditën e pestë në shtëpinë e të shoqit vajtohej vjehrra.
Në fakt, ky kthim ishte ndarja përfundimtare, pas dyshimeve të familjarëve të Liries se ajo nuk ishte vetëvrarë. Pavarësisht se familja Lami e mësoi të vërtetën nga hoxha, pasi panë një video-rrëfim të regjistruar prej tij, me përjashtim të Oltit (bashkëshoriti) asnjëri nuk ju drejtua Prokurorisë./Opinion.al
