Forcat ushtarake irakianë kanë arritur të marrin nën kontroll aeroportin e qytetit të Mosulit, disa orë pas nisjes së super-operacionit kundër shtetit islamik, i cili kontrollon gjysmën perëndimore të qytetit.
Lajmi u bë i ditur nga mediat shtetërore vendase, teksa Mehdi Abbas, komandant i Brigadës së tretë të njësive të Reagimit të Shpejtë, konfirmoi se aeroporti tashmë është pastruar nga militantët dhe ndodhet në duart e ushtrisë vendase.
Policia federale dhe një njësitë elitë të ministrisë së brendshme luftuan ashpër me militantët ekstremistë.
të cilët kanë përdorur bomba dhe sulme kamikaze me qëllim frenimin e ofensivës ushtarake. Marrja e aeroportit të Mosulit po përdoret si trampolinë nga forcat ushtarake të Irakut për të nisur më vonë sulmet në perëndim të qytetit.
Operacionet për të marrë nën kontroll të plotë Mosulin kanë nisur që në muajin tetor të vitit të shkuar, por vetëm në fillim të këtij viti, ushtria mundi që të zmbrapsë terroristët në pjesën lindore të qytetit.
Aktualisht në këtë zonë jetojnë afro 650.000 qytetarë, ndaj Organizata e Kombeve të Bashkuara ka apeluar për të bërë kujdes maksimal në operacione për të mos rrezikuar jetët e tyre.
Që prej nisjes së konflikteve, më shumë se 160.000 persona janë detyruar të largohen nga shtëpitë e tyre.
Ekspertët bëjnë të ditur se rimarrja e qytetit të Mosulit ka një rëndësi mjaft të madhe strategjike, pasi mund të bllokojë edhe rrugët e furnizimit për militantët e Shtetit Islamik./oranews
