Policia izraelite ka sulmuar dhe arrestuar dhjetëra besimtarë palestinezë në kompleksin e Xhamisë Al-Aksa në Jerusalemin Lindor.
Sipas mediave të huaja bëhet me dije se janë arrestuar rreth 400 palestinezë dhe të paktën 14 persona raportohet se kanë mbetur të plagosur, në një bastisje të kryer në orët e para të mëngjesit të së mërkurës.
Dëshmitarët palestinezë thanë se policia izraelite përdori dhunë të tepruar, duke përfshirë granata dhe gaz lotsjellës, ku siç shihet edhe në pamjet e publikuara në mediat sociale shfaqen duke rrahur palestinezët me shkopinj.
Pas dhunës në Al-Aksa, disa raketa janë hedhur hodhën nga Gaza veriore drejt Izrael-it. Ushtria izraelite tha se të paktën pesë raketa u kapën nga sistemi i mbrojtjes ajrore rreth qytetit të Sderot në jug të Izrael-it dhe se katër të tjera kishin rënë në zona të pabanuara.
Bastisjet kanë vazhduar deri mëngjesin e të mërkurës, kur forcat izraelite kanë sulmuar dhe dëbuar palestinezët nga kompleksi i xhamisë, duke i penguar ata edhe të faleshin.
“Unë isha ulur në një karrige duke recituar Kuranin,” tha një grua e moshuar për Reuters ndërsa ishte ulur jashtë xhamisë, duke luftuar për të marrë frymë. “Ata hodhën granata trullosëse, njëra prej tyre më goditi gjoksin,” tha ajo ndërsa filloi të qante.
Tensioni ka qenë tashmë i lartë në Jerusalemin Lindor të pushtuar dhe Bregun Perëndimor prej muajsh. Zyrtarët kanë thënë se ekziston frika e dhunës së mëtejshme, në një kohë kur jemi në mes të festave të rëndësishme fetare, siç është muaji i agjërimit të Ramazanit dhe Pashkët hebraike./Opinion.al
