Vlora është çdo vit zemra e festës së Pavarësisë, por këtë 111- vjetor duket se Tirana do të jetë kryeqendra e festimeve. Parada madhështore “Rrënjët kuq e zi” nuk do të jetë e vetmja që do të marrë vëmendjen e kryeqytetasve, por edhe të gjithë shqiptarëve kudo ku jetojnë që do të zgjedhin metropolin tonë për të festuar 28 nëntorin.
Ministria e Kulturës nën kujdesin e veçantë të Kryeministrit Edi Rama ka vendosur të bëjë bashkë nesër në mbrëmje në orën 20.30 ansamblet nga e gjithë Diaspora.
“Folk Fest”, koncerti që do të shënojë përmbylljen e festimeve për Pavarësinë do të mbledhë në sheshin “Skënderbej” Ansamblin e Këngëve dhe Valleve Popullore të Shqipërisë, Ansamblin e Këngëve dhe Valleve “Shota” të Kosovës, Ansamblin e Këngëve dhe Valleve të shqiptarëve të Maqedonisë së Veriut, Shoqatën “Rapsha” të Malit të Zi dhe qershia mbi tortë, Ansambli arbëresh “Shqiponja”.
Pjesë e koncertit do të jenë dhe grupe folklorike nga e gjithë Shqipëria. E kthyer në kolonën zanore të çdo ndeshjeje të Kombëtares tonë nuk do të mungojë dhe interpretimi i këngës himn të Shkurte Fejzes “Mora fjalë”.
