Fondi Monetar Ndërkombëtar ngre shqetë- simin se zgjedhjet e ardhshme parlamentare mund të dobësojnë vazhdimin e reformave të qeverisë dhe buxhetit.
Pas miratimit të marrëveshjes së tetë për lëvrimin e 35,9 milionë euro kredi, në raportin për ekonominë, FMN, edhe pse vlerëson reformën në energji dhe informalitetin, shfaq frikën se zgjedhjet mund të ndikojnë në disiplinën e këtyre reformave.
“Reforma e sektorit të energjisë elektrike dhe fushata kundër informalitetit, të dyja duken që po japin rezultate, por afrimi i zgjedhjeve të përgjithshme në mes të vitit 2017 mund të dobësojë disiplinën e politikave”, thuhet në raportin e Fondit.
Shkak i shqetësimit të ngritur nga Fondi Monetar Ndërkombëtar është mundësia e tensioneve politike që mund të lindin gjatë fushatës. Fondi vlerëson ecurinë e deritanishme të reformave dhe shprehet se zgjedhjet e ardhshme do të testojnë këmbënguljen e qeverisë për të mbrojtur reformat fiskale.
“Rreziqet për programin mbeten të larta. Autoritetet mbeten të vendosura për të përmbushur objektivat e programit. Megjithatë, me zgjedhjet e ardhshme të përgjithshme nga mesi i vitit 2017, tensionet politike mund të testojnë këmbënguljen e autoriteteve për reformat dhe angazhimin e tyre për konsolidimin fiskal. Mobilizimi i të ardhurave kërkon vullnet të qëndrueshëm politik dhe është e ndjeshme ndaj pengesave në kapacitetet administrative dhe teknike. Më në fund, pavarësisht nga përparimi mbresëlënës deri tani, reformat e sektorit të energjisë elektrike janë subjekt i zbatimit dhe për rreziqet që lidhen me motin dhe do të kërkojë angazhim të palëkundur politik edhe në periudhën afatmesme. Zbutja e rreziqeve ofron katalizatorin e reformave dhe perspektivën për anëtarësimin në BE”, thuhet në raport.
MARRËVESHJA
Në fund të muajit shkurt të vitit të ardhshëm, qeveria përfundon marrëveshjen 3- vjeçare me Fondin Monetar Ndërkombëtar. Qeveria nënshkroi më 28 shkurt 2014 marrëveshjen për 36 muaj me Fondin, çka do të lëvronte 330,9 milionë euro kredi.
Ende nuk dihet nëse qeveria pas muajit shkurt do të ripërtërijë marrëveshjen me fondin Monetar Ndërkombëtar. Në raport ndërkombëtarët, teksa paralajmërojnë përfundimin e programit në shkurt, thonë se thonë se ai siguron mbështetje për politikat e qeverisë në prag të zgjedhjeve. Megjithatë, bordi i fondit kërkon që prioritet të mbeten reforma fiskale dhe ulja e nivelit të kredive të këqija.
“Prioritetet kryesore mbeten politikat fiskale, reduktimi i kredive me probleme në sektorin bankar dhe zbatimi me shpejtësi i reformave strukturore. Këto reforma janë të rëndësishme për të përballuar më mirë rreziqet dhe për të rritur besimin për të arritur një rritje të fuqishme, të qëndrueshme e investimeve. Programi, i vendosur të përfundojë në shkurt 2017, siguron një mbështetje të rëndë- sishme për zbatimin e këtyre politikave në prag të zgjedhjeve në mes të vitit 2017”, thuhet në raport./Panorama
