Është përuruar ditën e sotme, fillimi i fluturimeve për linjën e parë ajrore low cost Tiranë-Budapest, duke ngjallur shpresat për një ulje të çmimeve të biletave në vend.
Ministri i Transportit dhe Infrastrukturës Sokol Dervishaj bashkë me Ministrin Hungarez të shtetit për Politikat e Transportit Robert Homolya, ishin në bordin e avionit të parë të linjës Budapest-Tiranë.
Duke folur për mediat, Ministri Dervishaj tha se ky është një premtim i mbajtur nga Ministria e Transportit, për të sjellë një kompani të njohur ndërkombëtare me çmime të lira për shqiptarët.
”Sikurse dhe kishim premtuar dhe së fundi edhe realizuar, ky ishte fluturimi i parë i kompanisë ëizzair në Tiranë, e para kompani loë cost që vjen dhe fillon fluturimet në Shqipëri. Kjo ka ardhur falë një bashkëpunimi të ngushtë me autoritetet hungareze, veçanërisht me Ministrinë e Zhvillimit Kombëtar, por edhe autoriteteve të aviacionit civil, arritëm në një marrëveshje për fillimin e udhëtimeve, me një linjë të ndërprerë prej shumë kohësh me Malevin. Prej 5 vitesh nuk kishte fluturime direkte mes Shqipërisë dhe Hungarisë, por tashmë e kemi falë këtij bashkëpunimi”, tha Dervishaj.
Ministri i shtetit Hungarez për Politikat e Transportit Robert Homolya tha fillimi i fluturimeve do ti japë zhvillim turizmit dhe ekonomisë mes 2 vendeve.
“Unë mendoj se është një moment i madh në jetën e dy vendeve. Ne duam të zhvillojmë turizmin dhe tregtinë mes 2 vendeve, dhe jam i sigurt se ky është një hap i madh. Qeveria e Hungarisë, ka bërë 1 vit negociata me Bashkimin Europian, për të bërë të mundur që buxheti i shtetit të kontribuojë për këtë linjë, në Shqipëri dhe rajon. Kështu që le ta gëzojmë”, tha Homolya.
Më herët në Budapest u zhvillua dhe ceremonia me të pranishëm Ministra dhe zyrtarë nga vendet e Ballkanit Perëndimor, ku kompania wizzair ka filluar operimin.
