Pas vendimit të qeverisë për të ndaluar fluturimet e drejtpërdrejta të Shqipërisë me Italinë e veriut deri më 3 Prill, përmes një njoftimi në FB, Autoriteti i Aviacionit Civil ka publikuar edhe listën e aeroporteve me të cilët nuk do të kryhen fluturime ajrore. Kjo është një ndër masat e ndërmarra, për të ndaluar përhapjen e virusit COVID 19,pas identifikimit të dy rasteve të para në vend, të importuara nga Italia.
Njoftimi i plotë
Njoftim i rëndësishëm në lidhje me COVID-19 dhe fluturimet për/nga Shqipëria dhe Italisë.
Në vijim të situatës së krijuar në Itali për shkak të përhapjes së COVID-19, masave të marra nga qeveria italiane për vendosjen e karantinës në veri të Italisë, si dhe masave parandaluese të përhapjes së virusit në vendin tonë, në zbatim të urdhrit të Ministrisë së Infrastrukturës dhe Energjisë, ndalohen të gjitha fluturimet për dhe nga Aeroporti Ndërkombëtar “Nënë Tereza” dhe:
- Aeroporti Milano Malpensa (MXP)
- Aeroporti Milano Bergamo (BGY)
- Aeroporti Bologna (BLQ)
- Aeroporti Firenze (FLR)
- Aeroporti Genoa (GOA)
- Aeroporti Perugia (PEG)
- Aeroporti Pisa (PSA)
- Aeroporti Rimini (RMI)
- Aeroporti Venezia (VCE)
- Aeroporti Verona (VRN)
Autoriteti Aviacionit Civil ka lëshuar menjëherë udhëzimin drejtuar Aeroportit Ndërkombëtar “Nënë Tereza” dhe ofruesit të shërbimit të lundrimit ajror “Albcontrol” për nxjerrjen e njoftimeve të nevojshme për zbatimin e këtij kufizimi të fluturimeve për/nga aeroportet e lartpërmendura, deri në një njoftim të dytë.
Por ndërkohë, në faqen e aeroportit, që publikon fluturimet dhe oraret e tyre në kohë reale, shihet se deri në këto momente keto ndryshime nuk janë pasqyruar. Aktualisht në këtë faqe janë të anuluara vetëm fluturimet e Air Albania,(e cila në fakt që dje për arsyet operacionale kishte anuluar fluturimet me Italinë) ndërsa linjat e tjera vijojnë të figurojnë në listë për kryerjen e fluturimeve./Opinion.al
