Altin Hila është themeluesi i një muzeu privat në Divjakë i cili numëron qindra lloje insektesh.
Në programin “Rudina” në Tv Klan, ai tregon se historia e muzeut nis që në fëmijëri.
Ai është rritur gjithnjë pranë natyrës dhe në vitin 2001 kur u kthye nga emigracioni, vendosi që koleksionin ta ndante me shumë njerëz.
Në koleksionin e tij që është rezultat i një pune shumëvjeçare, Altini numëron mbi 520 lloje fluturakësh. Por nga kjo, ai arrin të nxjerrë në pah edhe një anë problematike: zhdukjen e gjallesave.
Altin Hila: Ky molusk fatkeqësisht nuk gjendet më që prej 30 vitesh në territorin tonë sepse kjolloj guaske është një specie që ka jetuar midis ujit të kripur dhe ujit të ëmbël në territorin e Karavastasë dhe në vitet ’82-’83, reforma e bonifikimeve mbarëshqiptare preku edhe territorin tonë, Karavastanë dhe në këtë territor fillon zhdukja e baseneve të ish-lumit Devoll dikur dhe me zhdukjen e basenit, për fat të keq, edhe ato u zhdukën.
Te fluturat, Altini thotë se nga 125 lloje në koleksionin e tij, në natyrë qarkullojnë fare pak.
Altin Hila: Janë 125 flutura dite që më duhet ta theksoj sepse sot në ditët që po jetojmë, në epokën që po jetojmë, po jetojmë në një situatë kritike, alarmante me praninë e zhdukjes së specieve. Sot në qarkullim në natyrë fatkeqësisht 5-6 specie fluturash qarkullojnë nga 125 që unë kam në koleksion. Është një kambanë alarmi.
Ai shprehet se pavarësisht përpjekjeve të tij tashmë edhe si një konservues i kandrrave, nevojiten masa të mëtejshme.
Altin Hila: Alarmi është i përditshëm dhe ne luftojmë shumë duke bërë promo. Rezultati lë shumë për të dëshiruar./tvklan
