Temperatura e lartë, kolla dhe problemet në rrugët e frymëmarrjes janë simptomat që po prekin më shumë te vegjëlit gjatë kësaj periudhe sipas mjekëve pediatër.
Arda Gjermeni (mjeke pediatre): Është periudha që ne duhet të përballemi me shumë viroza, duke filluar që nga virusi i influencës që njihet si gripi i zakonshëm, virusi respirator. Zakonisht paraqiten me temperaturë të lartë që mund të jetë 38 e gjysmë, 39.
Kjo është normale në ditët e para kur edhe sistemi imun është në gjendje alarmi. Fatmirësisht të pakta kanë qenë rastet kur kemi kaluar në infeksione të rrugëve të poshtme respiratore. Pjesa kryesore e vizitave kanë qenë të rrugëve të sipërme respiratore.
Për të përballuar sa më lehtë këto probleme rekomandohet që të ndiqen këshillat e mjekëve dhe mbi të gjitha një dietë sa më e shëndetshme.
Arda Gjermeni (mjeke pediatre): Gjëja e parë që duhet të bëjmë, është me antipiretikë. Pra të zakonshmit, që çdo familje i ka në shtëpi, pra paracetamolin, ibuprofenin në varësi të këshillës së mjekut. Me kompresa, lëngje sa më shumë, lëngje të freskëta frutash pasi është e rëndësishme që fëmijët të jenë të hidratuar.
Nëse fëmijët janë me viroza, nuk rekomandohet dërgimi i tyre në kopshte apo shkolla dhe mbi të gjitha të mbahen sa më larg ambienteve të mbyllura të mbipopulluara./klannews
