Kur koronavirusi u shfaq disa muaj më parë në botë, autoritet shëndetësore njoftuan për rrezikshmëri të lartë tek personat e moshuar dhe ata që kishin patologji të tjera shoqëruese. Por sikurse shkruan CNN, tashmë zyrtarët janë duke paralajmëruar për rreziqet e shtuara të Covid-19 tek personat e rinj në moshë. I tillë ishte edhe rasti i 29-vjeçarit Jerry Ward, i cili tregoi për CNN se kishte përfunduar në spital pasi ishte infektuar në një festë në ditëlindjen e kushëririt të tij.
“Tre ditë më pas, të gjithë filluan të njoftonin njëri-tjetrin se nuk po ndjeheshin mirë”, tha Ward për CNN nga dhoma e spitalit në Florida.
Sipas tij, 10 persona pjesëmarrës në festë, të moshës 20-30 vjeç u diagnostikuan me Covid-19.
Sipas guvernatorit të Floridas Ron DeSantis, fillimisht mosha mesatare e personave të prekur ka qenë 65 vjeç. Por gjatë javëve të fundit ajo zbriti në 35 vjeç.
“Ajo që kemi parë veçanërisht gjatë javëve të fundit është një shpërthim i vërtetë i rasteve tek të rinjtë,” tha DeSantis në një konferencë në fillim të javës. “Gjysma e testeve pozitive janë nga mosha 34 e poshtë”, tha guvernatori./Opinion.al
