Euxhenio Fasheti është një emër mjaft i njohur në Itali, ku për shumë vite ka drejtuar skuadra në Serinë A dhe B, si dhe ka zbuluar disa emra të njohur, mes të cilëve Antonio Kasanon. Ai dha mundësinë sulmuesit të shkëlqente në Serinë A që në moshën 17-vjeçare ndaj shumëkush e cilëson një ekspert për sa u përket të rinjve.
Në një intervistë për mediat italiane, Fasheti është pyetur nëse sheh të ardhme për Lacion aktuale. Sipas ish-trajnerit, që ka drejtuar këtë klub në vitet 1986-1988, me pak përforcime, kjo skuadër mund të luftojë për titull dhe ka një grup të shkëlqyer të rinjsh.
“Një skuadre të tillë i mjaftojnë 2-3 afrime për të luftuar për titullin kampion. Ndoshta një përforcim për çdo repart. Më i miri në fushë në derbi ishte portieri Strakosha. Ka bërë tre pritje të shkëlqyera”, tha ai.
