Trajneri i Luiza Gegës, Taulant Stërmasi ndihet i pikëlluar me dëmtimin e atletes në Olimpiadë.
Në një prononcim për “Panorama Sport”, Stërmasi zbuloi se Gega përveç se ka garuar mes dhimbjeve në këmbë, ajo rrezikoi të këpuste edhe ligamentin.
“Luiza e vazhdoi garën me dhimbje të madhe. Përveç se tendina po bllokonte gjithë këmbën, dhimbja sa vinte e shtohej.
Në fundin e xhiros së parë e zuri ngërçi te 4 gishtat e këmbës së dëmtuar, të cilët po e bllokonin totalisht.
Edhe pse pas 30 minutave që gara kishte mbaruar, ende ngërçi nuk kishte ikur nga gishtat dhe u desh të fillonim masazhin që t’ia qetësonim.
Unë për vetë nuk do ta kisha mbyllur garën dot në atë situatë. Vetëm Luiza mund ta bëjë. Problemi ishte se duhej të kaloje 35 pengesa, për më tepër 7 prej tyre janë me goditje të fortë në pengesën e ujit.
Thjesht në garë pashë një Luizë që bëri sakrificë të çmendur duke e përfunduar garën edhe pse e dinte se mund të këpuste tendinën në atë gjendje që ishte këmba”, deklaroi tekniku Stërmasi.
Sipas tij edhe pas garës, Gega u trajtua me akull dhe tashmë do të nisin konsultat mjekësore me një staf italian që është prezent në Fshatin Olimpik.
“Kam pasur komunikim me mjekun dhe sipas tij do të bëjmë një kontroll të menjëhershëm dhe më pas do të bëjmë rezonancën magnetike, nëse është e nevojshme, për të kuptuar më mirë se në çfarë faze ka shkuar dëmtimi.
Ajo që shihet me sy është se tendina e këmbës së majtë është pothuajse 50 për qind më e madhe se e të djathtës që nuk ka shqetësim. Shpresojmë në një rikuperim të shpejtë dhe për aq kohë sa jemi këtu do të mundohemi të përfitojmë sa më shumë nga mjekët specialistë të fushës.
Pastaj dhe kur të kthehemi nëse do të duhet do të shkojmë jashtë për vizitë apo trajtim të specializuar. Sa për mërzitjen time nuk di çfarë të them se e di shumë mirë se kishim mundësi reale për të qenë në “top 8″ në olimpiadë. 9.30 ishte kohë kualifikuese dhe e shihja shumë të thjeshtë që Luiza të bënte më mirë se Europiani 9.28. Gjithsesi nuk kishim as fatin me vete dhe as këmbën fatkeqësisht”, deklaroi trajneri Stërmasi.
Panorama Sport
