“Pas Aldo Bares jam personi i dytë më i akuzuar”. Është kjo deklarata e ish-ministrit të Brendshëm Saimir Tahiri që u njoh sot me akuzat e ngritura ndaj tij, pasi Prokuroria e Krimeve të Rënda njoftoi të mërkurën se ka mbyllur hetimet në ngarkim të Tahirit.
“Akuzohem për trafik narkotikësh, grup të strukturuar kriminal, e të tjera. Nuk më vjen në mend njeri tjetër, mbas Aldo Bares jam i dyti me akuzat. Nuk është se ka ndonjë surprizë të madhe, prokuroria e komanduar siç e nisi ashtu e bitisi, pavarësisht nxitjes që kam nga brenda për t’u marrë me këtë histori, nuk dua të merrem. Komenti im është do vazhdoj t’i shkoj drejtësisë deri në fund. Kjo historia ime lindi si një proces politik dhe kur them i komanduar kam parasysh politikën, krimin dhe drejtësinë që janë aq bashkë sa janë ati, biri dhe shpirti i shenjtë. Nuk janë ndarë ende dhe unë po e shoh”, u shpreh Tahiri.
I pyetur nëse i druhet një mase me burg nga prokuroria, Tahiri tha: “Mua nuk më frikëson gjë përveç të vërtetës. Unë di që ky është një proces i turpshëm, nga fillimi deri në fund. Unë jam mësuar me vështirësi, do ia dal dhe kësaj.”
Në gjykim se bashku me ish-ministrin e Brendshëm do shkojnë edhe tre ish- zyrtarët e policisë së Vlorës. Mbi Jaeld Celën, Gjergj Kohilën dhe Sokol Boden rëndon akuza e trafikut të lëndëve narkotike. Në Janar të këtij viti, organi i akuzës njoftoi zgjatjen me tre muaj të hetimeve për Tahirin, për shkak të letër- porosisë që autoritetet shqiptare i kanë dërguar Malit të Zi dhe Katanias. Ish- ministri ankimoi zgjatjen e hetimeve, dhe me 11 Shkurt, Gjykata e Krimeve të Rënda vendosi të pranojë kërkesën, duke iu lënë prokurorëve afat të përfundonin hetimet deri më datë 10 mars./ G.F Opinion.al
