Ersid Curri, djali nga Durrësi që ditën e sotme vrau gjyshen dhe më pas veten në banesën e tyre në qendër të qytetit, siç e kemi përmendur edhe në materiale të tjera, duket se ka pasur një të shkuar të errët dhe një jetë dramatike. Ai disa vite më parë kishte vrarë një bashkëmoshatar në një prej diskove të qytetit dhe ka plagosur një tjetër ndërsa i kanë ekzekutuar vëllanë dhe të atin gjatë kohës që ishte në burg.
Pak momente më parë në redaksinë e JOQ.al ka shkruar një prej ish-shokëve të qelisë së burgut të Ersidit. Ai thotë se e ka të pamundur të besojë që Sidi ka vrarë gjyshen e më tepër veten.
“E kam pas në dhomë dhe njoh shumë mirë. Nuk është nga ata çuna të bëjë këto veprime pavarësisht se rrejnë gazetat. Ai ka vrarë një djalë dhe ka plagos një tjetër. Atë tjetrin e ka plagosur pa dashje. E ka kapur plumbi qorr. Habitem, të ketë vrarë gjyshen ai është e pamundur”, – thotë ndër të tjera ish-shoku i qelisë së Ersid Currit.
Sipas djalit që ka preferuar të ngelet anonim, Sidi ka pasur një marrëdhënie shumë të ngushtë me gjyshen e tij, e cila vinte dhe e takonte herë pas here në burg. Ai tregon edhe për momentin kur e ka marrë vesh në burg që i kishin vrarë vëllanë. Për tipin e Ersidit ish-miku i qelisë shprehet se ishte një njeri i qetë, jo agresiv edhe pse kishte pasur jetë të vështirë.
“Atij i kanë vrarë vëllanë, çunin e xhajës, babanë e për të gjithë asnjë autor nuk është gjetur. Unë me Sidin kemi ndenjt në vitin 2009-2010 te minorenët në një dhomë me të. Madje kam qenë në dhomë me të kur erdhi pastruesi dhe na tha: “të kanë vra vëllain”. Unë u bë një kohë që s’e kam taku, po sa e kam njoft ai se bën këtë gjë. E donte gjyshen shumë. Ajo i vinte javë për javë në takim e na bënte byrek e gjëra të mira. Nuk vritet gjyshja asnjëherë në botë. S’e kam besuar asnjëherë që Sidi do vriste gjyshen, por gjithsesi e zgjidh prokuroria e hetuesia më mirë se ne”, – thotë për JOQ ish miku i qelisë së të ndjerit Ersid Curri.
