Tre biznenese u grabitën brenda një nate, duke u gdhirë e diela (4 Mars), mes tyre edhe “Morava”. Dyshohet se ka qenë i njëjti grup që ka vepruar me shpejtësi, duke arritur të marrë një shumë të konsiderueshme monetare. Autorët ende nuk janë zbuluar, ndërsa pronari i njërit prej bizneseve që ra pre e grabitjes, Gëzim Skerma ka rrëfyer ngjarjen për gazetën “Panorama”.
Ai tregon se autorët kanë hyrë fillimisht në banesën e tij dhe më pas kanë kaluar në ambientet e fabrikës së mjaltit. Pronari i kompanisë “Morava” thotë se, pasi ka ndjerë zhurma, ka marrë një armë gjahu që disponon me leje dhe është vënë në ndjekje të autorëve.
Si e zbuluat vjedhjen?
Ishte ora 02:30 e mëngjesit kur më zgjoi bashkëshortja ime. Kishte dëgjuar zhurmën e përplasjes së derës. Ne gjithmonë tregohemi të kujdesshëm dhe nuk lemë asgjë hapur edhe për shkak se kemi biznesin ngjitur me shtëpinë. Menjëherë u çova dhe mora çiften dhe shkuam te dhoma ngjitur për të parë se çfarë kishte ndodhur. Nisëm të kontrollonim të gjitha dhomat me radhë dhe nuk gjetëm asgjë.
Ju nuk konstatuat asgjë në banesë?
E pamë që dera ishte hapur nga dikush. Është e vetmja mënyrë nga mund të hyhet në banesën tonë, pasi të gjitha të tjerat janë me kangjella. Ne kemi edhe qen, por ata çuditërisht nuk lehën në asnjë moment.
Si vepruat më tej?
Kalova për të kontrolluar te fabrika. Edhe atje pashë që gjërat kishin lëvizur, dukej që kishte hyrë dikush te pjesa e zyrave, pasi ishin hapur të gjitha dyert. Vazhdova kontrollova dhe dola në oborr, por pashë që edhe dera e jashtme ishte hapur dhe kuptova që hajdutët ishin larguar.
Kur e lajmëruat Policinë për atë që kishte ndodhur?
Po telefonova dhe brenda pak minutash ata erdhën. Nisëm të kontrollonim të gjitha hapësirat dhe në një moment, te zyra kryesore pamë që gjithçka ishte përmbys dhe ishte marrë DVR. Mendoj se ka qenë grup i sofistikuar, pasi që të marrësh memorien e kamerave të sigurisë, do të thotë të zhdukësh të gjitha gjurmët.
Sa kamera sigurie kishit në biznesin tuaj?
Janë 36 kamera sigurie në total dhe ata përvetësuan të gjithë regjistrimin, madje mesa di unë, të njëjtën gjë kishin bërë edhe te biznesi tjetër në Zëmblak. Më çuditi edhe fakti që qentë nuk kishin lehur, por kur dola i pashë që ishin si të përgjumur, besoj u kishin hedhur diçka.
A ndiheni të frikësuar nga kjo ngjarje?
Jam i tmerruar. Pasi mësova që edhe kanë vjedhur dy biznese të tjera, ndihem vërtet i pasigurt.
