Prokurori i Prizrenit ka folur për sulmin fizik ndaj deputetit shqiptar, Eduart Ndocaj në Prizren. Ai, duke folur për “News24” ka zbuluar edhe emrin e personit që e sulmoi Ndocajn teksa ishte në Prizren.
Kështu, prokurori Sylë Hoxha ka thënë se personi që ka sulmuar Ndocajn është Ilirjan Bytyçi, tashmë i arrestuar. Bytyçi është person me precedentë penalë sipas prokurorit. Po kështu, prokurori ka thënë se Ndocaj ishte me një femër kur u sulmua dhe se pësoi dëmtime të lehta.
DETAJET NGA POLICIA
Zbardhen detaje nga sulmi fizik ndaj deputetit të Partisë Socialiste, Eduart Ndocaj, i njohur si “Kuaboji”, gjatë vizitës së tij në Prizren. Policia e Kosovës konfirmon se deputeti ishte i shoqëruar me shoferin dhe këshilltarin e tij, kur është sulmuar fizikisht nga disa persona afër një karburanti në fshatin Landovicë të Prizrenit.
Policia e Kosovës, në një përgjigje për “Indeksonline”, ka konfirmuar se pas këtij sulmi janë arrestuar dy të dyshuar, njëri shtetas i Shqipërisë kurse tjetri nga Kosova. Zëdhënësi i PKsë për rajonin e Prizrenit, Hazir Berisha tregon se ka pasur një denoncim.
Sipas tij, organet e sigurisë kanë ndërmarre veprimet dhe kanë arrestuar të dyshuarit, të cilët kanë sulmuar deputetin e Kuvendit të Shqipërisë.
“Ka pasur një denoncim dhe Policia e Kosovës ka shkuar në vendin e ngjarjes rreth orës 13:50 në Landovicë të Prizrenit në një market”, thotë ai.
Më tej, Berisha shpjegon se eskorta e deputetit ka ndaluar për t’u furnizuar me ujë e aty janë takuar me dy të dyshuar, njëri nga Prizreni e tjetri nga Kukësi.
“Mes tyre ka pasur një përleshje të vogël. Ne kemi incizimet që i kemi siguruar përmes kamerave të sigurisë. Policia e ka hetuar rastin, janë arrestuar dy të dyshuarit dhe me vendim të prokurorit të dy iu është caktuar masa e arrestit për 48 orë”, ka treguar ai.
Vetë Ndocaj e ka mohuar një lajm të tillë, duke thënë se është shëndoshë e mirë.
