TIRANË- Merita, nëna e 15-vjeçarit E. D. që ka denoncuar abuzimin seksual nga një i moshuar thotë se e kanë marrë vesh ngjarjen vetëm kur djali kishte denoncuar në polici. Gjatë një interviste për “Gazeta Shqiptare”, ajo thotë se të moshuarin nuk e njeh, ndërsa kërkon që të dënohet.
Znj. Merita, si e morët vesh abuzimin që i ka ndodhur djalit tuaj?
Unë kam tre djem. Jo se janë fëmijët e mi, por e them me siguri se janë fëmijë të mbarë dhe nuk janë përzier me asnjë prapësi në jetën e tyre. E. është fëmija i vogël i familjes. Është ende në 9vjeçare. Të shtunën më merr një polic në telefon dhe më thotë: “Kemi djalin tuaj në komisariat, ejani ta merrni”. Ngaqë nuk më thanë emër, mendova se bëhej fjalë për ndonjë nga djemtë e mëdhenj. Thashë se mos kanë bërë ndonjë sherr dhe janë ndaluar. Kur shkova dhe pashë se aty ishte djali i vogël, nuk munda ta besoja. Ai ishte në një dhomë me një psikologe dhe kur e pyeta “çfarë ke bërë?, – nuk m’u përgjigj. Policët më treguan se çfarë kishte thënë djali. U tmerrova! Në korridor pashë edhe shokun e djalit, R., i cili ka qenë komshi me familjen time.
Po me E., ke biseduar për këtë temë? Ke vënë re ndonjë sjellje të dyshimtë?
Eshtë një fëmijë shumë i urtë. Ai tregohet gjithmonë shumë i hapur me mua dhe më tregon gjithçka. Kur e pyeta në lidhje me atë që kishte thënë në polici, më tha: “E denoncova atë plakun sepse më detyronte të merrja lekë dhe të lypja”. Këtë u kishte thënë edhe dy vëllezërve të tjerë. Nuk kam dashur t’i ushtroj presion me pyetje, pasi më tha se “sot do të shkoj sërish në komisariat dhe në prani të psikologes do të flasim për këtë temë”.
E njihni ju 76vjeçarin që dyshohet se ka abuzuar me djalin tuaj?
Jo, nuk e njoh. Djali më ka thënë se e ka takuar rastësisht në qendër të Tiranës kur ishte duke luajtur me shokun e tij. Ne nuk i kemi bërë keq njeriu. Jemi familje e thjeshtë, që jetojmë me hallet tona. Im shoq punon me javë të tëra si murator në Peshkopi për të rritur fëmijët. Prandaj kërkoj nga drejtësia që ta ndëshkojë personin që na ra në qafë.
