Lionel Messi është sportist aq dominues saqë do t’i kishte fituar hiç më pak se 50 tituj grand slam, sikur të ishte tenist, thotë bashkëlojtari i tij te Barcelona, Ivan Rakitic.
Messi e ka frymëzuar Barcelonën drejt dy titujve në sezonin 2017/18, La Ligën dhe Kupën e Mbretit, teksa vetë e fitoi këpucën e artë si golashënuesi më i mirë për herë të pestë në karrierë, transmeton Gazeta Express.
Megjithatë, ai ende nuk ka fituar ndonjë trofe të madh ndërkombëtar, pasi me të Argjentina e humbi një finale të Kupës së Botës dhe dy finale të Kupës së Amerikës në katër vitet e fundit.
Por, Rakitic, i cili është duke u përgatitur për Kupën e Botës 2018 po ashtu, sugjeroi se Argjentina – që është në një grup me Kroacinë – kanë mundësi të mirë për ta fituar Botërorin në Rusi, përkundër se Messi ka insistuar se nuk janë favorit.
“Siç u kam uruar të gjithë bashkëlojtarëve tjerë që marrin pjesë në Botëror, edhe Messit i kam uruar fat”, ka thënë Rakitic.
“Natyrisht se kur e ke lojtarin më të mirë në botë je favorit, edhe pse ai thotë se nuk janë. Ai do t’i jepte disa tituj me Barcelonën për Kupën e Botës. Sikur Messi të luante tenist, ai do t’i kishte fituar 50 tituj grand slam”.
Grand slam-et janë titujt më të rëndësishëm në sportin e tenisit, dhe mbahen katër herë në vit. Rekordin për më së shumti tituj të fituar e mban tenisti zviceran, Roger Federer, me 20 në total.
Federer konsiderohet nga shumë si njëri prej atletëve më të mëdhenj në histori të sportit dhe si tenisti më i mirë i të gjitha kohërave.
