Legjenda e Romës, Francesco Totti ka folur për periudhën që po kalon skuadra e Romës gjatë kohës që ka qenë i pranishëm në ceremoninë e ndarjeve të çmimeve sportive “Laureus Sport Award” në Montekarlo.
Jo vetëm kaq, por Totti ka parashikuar dhe derbin e fundjavës midis Milanit dhe Interit që do të luhet të dielën mbrëma.
“Na duhet të ecim përpara të bashkuar, me një objektiv të vetëm: të shkojmë sa më larg si në kampionat, ashtu edhe në Champions. Nuk jam i shqetësuar, e për këtë arsye jemi të gjithë me trajnerin, që do të bëjë përpjekjet e tij për të dalë nga kjo situatë. Shoqëria i qëndron pranë dhe do ta mbështesim deri në fund. Ai është një pikë e padiskutueshme në klubin tonë. Tani për tani nuk është ndonjë fazë tejet kritike, megjithatë do të kërkojmë që të ndryshojmë fatet tona” ka thënë Totti për ecurinë e ekipit të Romës.
Ndërkohë për derbin e Milanos, legjenda e Romës është shprehur: “Shpresoj që të fitojë Interi, sepse është më i fortë krahasuar me Milanin”.
Pavarësisht problemeve, Roma mbetet ende në garë për të zënë një vend në zonën Champions.
