Kompozitori i njohur Shpëtim Saraçi, para disa viteve u përball me një sëmundje tepër të rëndë. Ai kaloi një ishemi cerebrale, për të cilën u detyrua që të largohet, dhe të marrë trajtim mjekësor në Gjermani.
Tani, pasi gjithçka ka mbaruar, dhe është shëruar plotësisht, ai i është rikthyer punës dhe vazhdon të jetë pjesë e orkestrës së Televizionit Klan.
Në një intervistë të dhënë së fundmi për “Mapo”, Shpëtimi ka treguar se momenti kur ai u godit nga sëmundja ishte shumë i vështirë për të, pasi pikërisht në atë kohë, vajza e tij do të nisej për studime në Amerikë.
“Kam pasur emocione të jashtëzakonshme para se të më ndodhte ishemia cerebrale. Ishte koha kur vajza ime do të nisej për studime në Amerikë. Si çdo baba, që ka një lidhje fantastike me vajzat, edhe unë po e përjetoja shumë emocionalisht ikjen e saj prej shtëpisë”, ka thënë ai.
Shpëtimi ka treguar gjithashtu se ka qenë gjithnjë besimtar, por që “rikthimi” në jetë sipas tij, ka bërë që ai tashmë të ketë besim të jashtëzakonshëm tek Zoti.
Tani gjendja e tij shëndetësore është shumë e mirë, dhe aktualisht jeton bashkë me bashkëshorten e tij, këngëtaren Mira Konçi, në Tiranë.
