Tragjedia në zonën e Kombinatit në Tiranë ku u gjetën të vdekura Zhaneta dhe Anisa Josifi, nënë e bijë, ka tronditur opinionin publik për rrethanat e frikshme dhe të padëgjuara më parë në të cilat është zhvilluar.
Detaje të reja tronditëse janë zbuluar nga dëshmia e Blerta Josifit, vajzës së vetme të mbijetuar të shtëpisë, e cila ndodhet e shtruar në spital.
Gazetarja Anila Hoxha, raporton se vajza e mbijetuar ka pohuar se motra e saj, Anisa, ka vdekur 15 muaj më parë, pikërisht më datë 29 mars 2019. Ndërkohë sipas vajzës, mamaja e saj ka gjetur vdekjen më 2 korrik të këtij viti.
“Qëkur isha 15 vjeç kam ndjekur Dëshmitarët e Jehovait. Më vonë kemi qenë edhe në kishën Ungjillore. 2 vitet e fundit u shkëputëm dhe nuk shkonim në asnjë kult fetar, por besonim në ringjallje dhe i kryenim ritet në banesë. Ritet e ringjalljes fillimisht i nisi Anisa në fillim të vitit 2019. Qëndroi duke u lutur dhe pa ngrenë gati 2 muaj deri në Mars të 2019 ku ra në gjumë të thellë sepse u pushtua nga demonët. Motrën e lyenim me uthull se kështu na mëson bibla jonë”, ka dëshmuar Blerta Josifi.
E ëma Zhaneta dhe motra Blerta kanë nisur ritet e sakrificës një vit pas vdekjes së Anisës. Sipas dëshmisë, Zhaneta Josifi ka humbur jetën fillimin e Korrikut, ndërsa vetë Blerta ka vijuar me ritet derisa e gjeti policia.
“Një vit pasi motra ra në gjumë nisëm sakrificën unë dhe mami. Pinim vetëm ujë të filtruar në napa dhe nuk konsumonim ushqim. Gjithë ditën luteshim për të kthyer në jetë motrën. Në ditët e para të Korrikut mami ra pa ndjenja në mes të dhomës ku po lutej. Ndërsa unë vazhdova ritin derisa erdhi policia”, ka dëshmuar Blerta Josifi/ Opinion.al
