Ditën e djeshme 26-vjeçari Indrit Çelaj u qëllua me armë zjarri nga vëllezërit Kusi, teksa ishte duke punuar në vilën e tyre në zonën e “Myslym Shyri”.
Pas vdekjes së të riut, babai i viktimës, Batjar Çelaj, shprehet se lajmin për të birin e ka marrë përmes mediave. Ai shton se djali i tij nuk ka qenë i përfshirë në asnjë konflikt të mëprashëm.
“Kjo që më ndodhi mua mos i ndodhtë asnjërit. Kjo është fatkeqësi e madhe në Shqipëri. Ti nisesh në punë dhe kthehesh i vdekur është fatkeqësi. E kam marrë vesh nga gazetat. Çuni është vrarë ne 11 paradite une e mora vesh në orën 7 në darkë se i kishin marrë edhe dokumentet. Çunin e kishte marrë policia. Djali ishte në punë, punonte me kondicionerë se ka mbaruar edhe elektriken. Montonte kondicionerët. Asnjë konflikt nuk ka pasur djali, ka qenë i kulturuar dhe i sjellshëm. Rrallë gjen djalë si ai , nuk dinte të ofendonte ishte i matur. Ma morën djalin në moshë të re. Në fillim të shtatorit do bënim bufenë. Kur vajta në spital vetëm kam mbajtur veten. Sikur të kisha fuqi nuk dija se ca mund të bëja. Ku do kërkoj drejtësi, kush ma zgjidh mua”, është shprehur Batjar Çelaj.
Ndërkohë, policia ka shpallur në kërkim dy vëllezërit, Griseldo Kusi dhe Albano Kusi, ndërsa ka arrestuar dhe katër persona të tjerë për mos kallëzim krimi, mes të arrestuarve është dhe babai i vëllezërve Kusi./ Opinion.al E.Xh.
