Themeluesi i Wikileaks, Julian Assange rrezikon të torturohet, nëse ekstradohet në Shtetet e Bashkuara, tha një nga avokatët e tij.
“Argumentet e dhëna për përfundimin e qëndrimit gati-gati shtatëvjeçar të Assange nën azilin në ambasadën ekuadoriane të Londrës, ishin të rreme dhe tani do të fillojë një proces ekstradimi, por nëse ai shkon në SHBA rrezikon torturën” u tha gazetarëve, avokati Baltasar Garzon.
Julian Assange u arrestua në Ambasadën e Ekuadorit në Londër, ku qëndronte prej afro 7 vitesh, me statusin e azilantit. Ai është marrë në paraburgim në një stacion qendror të policisë në Londër ku do të qëndrojë deri sa të paraqitet para Gjykatës së Magjistraturës të Westminsterit.
Julian Assange është një haker kompiuterash nga Australia. Ai akuzohet nga prokuroria suedeze për dhunim dhe ngacmime seksuale, por ai thotë se ky është një skenar i nxitur nga autoritetet amerikane, pas publikimit të dokumenteve sekrete mbi luftën në Afganistan.
Assange zemëroi Shtetet e Bashkuara pasi faqja e tij elektronike publikoi një pafundësi dokumentesh të klasifikuara si sekrete që jepnin hollësi për operacionet ushtarake amerikane në Afganistan dhe Irak. Ai publikoi gjithashtu një video ku shihet një helikopter amerikan në vitin 2007 duke sulmuar në Bagdat dhe duke vrarë 12 persona, përfshi dy anëtarë të agjencisë së lajmeve Reuters./Opinion.al
