Ambasadori shqiptar në Greqi, Dashnor Dervishi ka reaguar pas ndalimit një ditë më parë të shoferëve të MPJ-së, Altin Tafa dhe Agim Asllani nga autoritetet greke.
Servishi sqaron se, librat nuk kanë pasur asnjë përmbajtje provokuese, por janë tekste që shkojnë çdo vit për zhvillimin e kurseve të gjuhës shqipe.
“Shoferët janë ndaluar nga punonjësit e doganës, ku te njëra nga pakot kanë parë librat me hartën, dhe më pas ka shkuar Konsulli ynë për të sqaruar këtë ngjarje. Një nga librat ka një hartë të Shqipërisë, harta normale e Shqipërisë, dhe tregon që popullsi shqiptare ka edhe në vende të ndryshme të botës. Ka në Kosovë, Maqedoni, Amerikë, Australi, Kanada; gjysma janë brenda, gjysma janë jashtë vendit, pra tregon përhapjet e popullsisë shqiptare jashtë territorit shqiptar. Tekstet nuk janë për shkolla, por janë për kurse. Kanë ardhur çdo vit këto libra, nuk është hera e parë”, shprehet zoti Dervishi.
