Për Cristiano Ronaldon nuk mund të kesh mendim “as mish, as peshk”. Thjesht nuk mund të jesh neutral. Mund të jesh “me Ronaldon” ose “pa Ronaldon”. Mund ta duash ose ta urresh. Mund ta votosh “pro” ose “kundër”, por kurrë të abstenosh. Ai i tillë është, një figurë frymëzuese për miliona njerëz në botë, ashtu si edhe një tabelë qitjeje për miliona të tjerë, të cilët e kritikojnë për egoizmin e theksuar.
I kësaj kategorie është aktorja spanjolle Elena Anaya, e cila e ka sulmuar hapur yllin e Real Madridit duke e quajtur “figurë të dëmshme për shoqërinë” dhe “idhull fals”. Anaya, e cila interpretoi me të famshmin Antonio Banderas në filmin “The Skin I Live In” nga Pedro Almodovar, ka theksuar se egoja e portugezit është e dëmshme për shoqërinë.
“Ne jetojmë në një kohë ku figurat e dëmshme si Cristiano Ronaldo pasqyrohen si vlera. Unë doja që Portugalia të fitonte Kampionatin Evropian, por nuk doja që Ronaldo të shënonte. Ai është një idhull fals, sepse shfaq vlera egoizmi. Si mund të festosh një fitore duke hequr fanellën tënde, në vend që të përqafosh shokët e tu të skuadrës? Këto janë vlera individualitike dhe materialitike, të cilat i bëjnë dëm shoqërisë”, – është shprehur bukuroshja 41 vjeçare.
