Lidhur me përplasjen fizike mes policit Bukurosh Zagrati dhe qytetarit Ardian Muça, emisioni “Stop” ka siguruar 3 dëshmi nga qytetarë, që kanë parë sherrin midis tyre.
Ata u shprehën, se ishte polici i cili e përndiqte Ardianin, duke i bërë presion të tërhiqte denoncimin e duke e goditur me dorezë hekuri.
“Pasi kemi pirë kafe kemi dalë te shkallët e lokalit që quhet lokal “Shira”. Ky Bukuroshi, gjatë kohës që po bënim muhabet tek shkallët ka kaluar dy herë, një herë lart, një herë poshtë. Ardiani i tha babit të vet që po shkoj të blej një paketë. Në këtë kohë i ka dalë në rrugë dhe i kërkonte të tërhiqte denoncimin meqë i kishte goditur nënën tek shtëpia, ka një vit përpara ngjarjes kjo punë. Ai e detyronte të tërhiqte denoncimin. Kishte dy-tre herë që i dilte në rrugë. Gjatë kësaj kohe ky ka sharë. Ardiani nuk ka duruar dhe janë konfliktuar. Ky ka gjuajtur me një dorezë hekuri. Ardiani ka qenë i mbuluar me gjak. Ndërkohë që ka marrë hov një oficer policie, por ata kanë qenë të ndarë. Ky ka hipur në makinë dhe është larguar. Ardiani ka qenë i mbuluar në gjak. Këto dëshmi që bëj unë janë 100% të vërteta”, tha një dëshmitar.
“Kam parë një lëvizje të tij (Bashkim Zagratit), ka lëvizur lart, ka qenë në makinë, dhe ka lëvizur në këmbë. Ai ka nxjerrë një dorezë hekuri dhe i ka rënë në kokë. Kemi dalë tek dera dhe kemi parë këtë”, tha një dëshmitar tjetër.
“Kemi qenë duke ardhur poshtë dhe kam parë shumë mirë Ardianin që ka dalë ku ka qenë duke blerë paketën dhe Bukuroshin. Ai i ka rënë në një dorezë hekuri. Edhe ky djali e ka goditur nga poshtë. I ka rënë edhe nga gjymtyrët. E kam parë shumë mirë. Bukuroshi u nis në makinë. Ardiani ka qenë i gjakosur komplet fytyra”, tha dëshmitari i tretë.
Prokuroria e Peshkopisë dhe Gjykata deri diku kanë bërë një punë të rregullt. Aty ku ka çaluar puna ka qenë tek mbrojtja e Ardian Muçës.
Gjatë hetimeve mbrojtja nuk ka bërë kërkesë apo kundërshtim të veprimeve të prokurorit. Nuk janë kundërshtuar vendimet për zgjatjen e hetimeve, nuk është kërkuar ekspertim për plagët e pretenduara që kishte kryer polici.
Bukurosh Zagrati pretendon që plagët e marra nga ky sherr kanë qenë vdekjeprurëse.
Polici Bukurosh Zagrati: Unë kam qenë i vetëm dhe më kanë dalë pas shpine dhe kam thikën pas shpine…Pastaj janë mundu thikat dhe kam rënë në gjendje kome.
Lind pyetja, si ka mundur që ky polic pas sherrit dhe dëmtimeve që pretendon të ketë marrë makinë dhe të shkojë vetë duke drejtuar automjetin e tij të shkojë në polici dhe më pas në spital.
“Punonjësi i policisë ka shkuar me këmbët e veta te makina. E ngiste ai vetë personalisht”.
“Bukuroshi ka hipur në makinë vetë. E kam parë me sytë e mi këtë. E ka shoqëruar edhe polici”.
Absurde është se si mjekoligjorët kanë dalë në konkluzion duke kqyrur fashot dhe jo plagët e shkaktuara që pretendonte polici.
Sot Ardian Muça është në burg për një vepër, që nuk e ka bërë. Ardiani ka lënë vetëm familjen, gruan dhe 3 vajzat, më e vogla 1 vjeç e gjysmë, të cilën nuk e ka parë kurrë./ TV Klan
