Deputeti i Partisë Demokratike, Flamur Noka, ka reaguar pas raportit të DASH, të cilin në një postim të publikuar në rrjetet e tij sociale, e quan “fshikullimë për qeverinë”.
Noka thotë se raporti flet për korrupsionin dhe presionin politik ndaj medias dhe gjyqësorit. Më tej, ai akuzon ambasadoren Yuri Kim se po hesht përpara kësaj çështjeje.
“Departamenti Amerikan i Shtetit për të Drejtat e Njeriut fshikullon qeverinë dhe pushtetin lokal!
Korrupsioni i vazhdueshëm në qeverisje, në organet e zbatimit të ligjit dhe në institucionet lokale, ishin problemet kryesore të trajtuara në raport.
Presioni politik, korrupsioni dhe mungesa e fondeve kufizuan median e pavarur të shkruar dhe gazetarët thuhet se kanë praktikuar autocensurë”, thuhet në këtë raport, duke konfirmuar akuzat e opozitës.
Raporti flet për korrupsion dhe presion politik ndaj medias dhe gjyqësorit, ndërsa ambasadorja Kim hesht. E keni dëgjuar ambasadoren Kim të thotë një gjysmë fjale për korrupsionin e Ramës dhe Veliajt?
Yuri Kim sillet si një shefe e propagandës për Rilindjen dhe ka bërë gjithçka për të promovuar politikisht anëtarët e qeverisë, kryebashkiakun Veliaj dhe KM Rama.
Yuri Kim ka mbyllur gojën për korrupsionin dhe duhet të sqarojë shqiptarët përse”-shkruan Noka./Opinion.al
