Kanë dalë detaje nga dosja e Prokurorisë së Tiranës për arrestimin e 6 personave (4 shqiptarë e dy ukrainas) të kapur si rrjedhojë e operacionit të koduar “Flakë në det”.
Sipas Klan News, ish-efektivi i policisë, Arlind Ismailukaj rezulton se më datë 15 gusht ka komunikuar me një person me pseudonimin “kapelja”, i cili dyshohet se ishte drejtuesi i mjetit lundrues gomone që u nis nga Patoku.
“Nga këqyrja e aparatit celular të shtetasit Arlind Ismailukaj rezulton se me datë 15.08.2023 nga ora 02:58, ky shtetas ka komunikuar me një person me pseudonimin “kapelja”, i cili sipas të dhënave nga policia gjyqësore është shtetasi i quajtur Arben Dalipaj, i cili dyshohet se ishte drejtuesi i mjetit lundrues gomone që u nis nga ‘Royal Blue’ në Patok bashkë me të dyshuarin Besnik Byberi, i cili u kap në flagrancë nga policia. Mësohet se të dy do e dorëzonin lëndën narkotike te “Royal Blue”, thuhet në dosje.
Po ashtu, gjithmonë sipas asaj që shkruhet në dosje, në kroskotin e makinës tip “Audi” të ish-policit Arlind Ismailukaj policia ka gjetur shuma të ndryshme parash.
Gomonia u pikas nga forcat policore teksa lundronte me shpejtësi drejt velierës “Niula”. Kjo e fundit kishte flamur të huaj dhe ishte futur pa leje në ujërat e territorit shqiptar, në afërsi të Kepit të Rodonit. Në velierë ndodheshin dy shtetasit ukrainas, ndërsa në gomonen e cila u ndoq nga policia ishin 4 shqiptarët.
Mësohet se grupi i shqiptarëve do ta shkëmbente lëndën narkotike kanabis me kokainë në ambientet e lokalit “Royal Blue” e më pas do të kryhej trafikimi i saj.
Ndërkaq, kujtojmë se sot 6 trafikantët e drogës (Arlind Ismailukaj, 47 vjeç, banues në Tiranë; Armando Mema, 37 vjeç, banues në Tiranë; Nerim Çela, 40 vjeç, banues në Fushë Kuqe, Laç; Besnik Brokeri, 51 vjeç, banues në Vlorë; Kyrylo Ponomarenko, 39 vjeç, banues në Ukrainë dhe Kostiantyn Biellon, 44 vjeç, banues në Ukrainë) janë lënë në burg nga Gjykata Penale./Opinion.al
