Mbreti Charles III hapi fjalimin e tij të parë të Krishtlindjeve drejtuar kombit si sovran me një homazh për nënën e tij, Mbretëreshën Elizabeth II, e cila vdiq më 8 shtator.
“Unë jam këtu, në kishën e mrekullueshme Saint George në Kështjellën Windsor, afër vendit ku nëna ime e dashur, mbretëresha e ndjerë, prehet përkrah babait tim të dashur,” tha ai, duke shtuar: “Më kujtohen letrat, shënimet thellësisht prekëse dhe mesazhet që shumë prej jush i keni dërguar gruas sime dhe unë dhe nuk mund t’ju falënderoj sa duhet për dashurinë dhe simpatinë që i keni treguar gjithë familjes sonë. Krishtlindja është një kohë veçanërisht prekëse për të gjithë ata që kanë humbur të dashurit e tyre”.
Ne e ndiejmë mungesën e tyre në çdo moment të njohur të sezonit dhe i kujtojmë në çdo traditë të dashur”, tha monarku sërish duke iu referuar të dashurve që kanë ndërruar jetë.
“Në këngën shumë të dashur ‘O Little Toën Of Bethlehem ne këndojmë për mënyrën se si “në rrugët tuaja të errëta shkëlqen drita e përjetshme”. Besimi i nënës sime në fuqinë e asaj drite ishte një pjesë thelbësore e besimit të saj te Zoti, por edhe besimi i saj te njerëzit, dhe është një besim që e ndaj me gjithë zemër. Është një besim në aftësinë e jashtëzakonshme të çdo personi për të prekur, me mirësi dhe dhembshuri, jetën e të tjerëve dhe për të ndriçuar botën përreth tyre. Ky është thelbi i komunitetit tonë dhe vetë themeli i shoqërisë sonë”, tha mbreti Charles./Opinion.al
