Dy fëmijë të zhytur mes betonit në mbetjet e shtëpisë së tyre në Sirinë veriore janë shpëtuar më shumë se 36 orë pasi tërmeti i së hënës bllokoi familjen e tyre teksa flinin.
“Më largoni nga këtu, unë do të bëj gjithçka për ju,” u pëshpëriti fëmija më i madh shpëtimtarëve në Besnaya-Bseineh, një fshat i vogël në Haram, Siri.
“Unë do të jem shërbëtorja juaj,” shton ajo, ndërsa një shpëtimtar përgjigjet, “Jo, jo.”
Emri i vajzës është Mariam dhe ajo përkëdhel butësisht flokët në kokën e vëllait më të vogël, ndërsa ata shtrihen të shtrënguar së bashku në atë që mund të jenë mbetjet e shtratit të tyre. Ajo është në gjendje të lëvizë krahun e saj aq sa të mbulojë fytyrën e vëllait duke siguruar njëfarë mbrojtjeje nga pluhuri në mes të mbeturinave.
Emri i fëmijës më të vogël është Ilaaf, sipas babait të tyre – një emër islamik që do të thotë mbrojtje.
Mustafa Zuhir Al-Sayed thotë se gruaja dhe tre fëmijët e tij ishin duke fjetur në orët e para të së hënës kur toka u lëkund me një tërmet 7.8 ballë, më i madhi që goditi rajonin në më shumë se një shekull.
“Ne ndjemë tokën duke u dridhur … dhe rrënojat filluan të binin mbi kokën tonë dhe ne qëndruam dy ditë nën rrënoja,” tha ai. “Kemi kaluar, një situatë, një ndjenjë që shpresoj se askush nuk duhet ta ndjejë.”
I ngujuar nën rrënoja, Al-Sayed tha se familja e tij citoi Kuranin dhe u lut me zë të lartë që dikush t’i gjente.
“Njerëzit na dëgjuan dhe ne u shpëtuam – unë, gruaja ime dhe fëmijët. Faleminderit Zotit, të gjithë jemi gjallë dhe falënderojmë ata që na shpëtuan”, tha ai.
Fëmijët u dërguan në spital, ku po marrin kujdesin mjekësor.
Në çdo orë që kalon, shpresa për të gjetur familje të tjera zbehet në temperaturat e ftohta që e kanë bërë më të vështirë mbijetesën edhe për ata që arritën të shpëtonin nga ndërtesat e shkatërruara.
