Regjisorja Elizabeth Chai Vasarhelyi ka arritur të triumfojë në ceremoninë e mbrëmshme të ndarjes së çmimeve Oscar, pasi dokumentari i saj dhe Jimmy Chin, i quajtur “Free Solo” u zgjodh si “Dokumentari më i mirë”. Emri i regjisores nuk është i panjohur për shqiptarët, pasi vite më parë ajo ka realizuar një dokumentar mbi gjendjen e të rinjve kosovarë në periudhën e pasluftës, të titulluar: “A Normal Life”.
Sipas “Klan Kosova” ky dokumentar nga Elizabeth Chai flet për jetën e shtatë të rinjve në moshë në kohën e pasluftës në Kosovë. “A normal Life” është një dokumentar, i cili përmes historive të traumës dhe rimëkëmbjes, dëshpërimit dhe shpresës së përtërirë, shfaq transformimin e mrekullueshëm të shtatë personave, të cilët nga fëmijë të rritur mes konfliktit kthehen në udhëheqës të një shteti të ri, në gjendjen e vështirë të pasluftës.
Ndërsa dokumentari me të cilin ajo fitoi çmimin ”Oscar” flet për sfidën e një alpinisti, për t’u ngjitur pa litar në formacionin e famshëm të shkëmbinjëve El Capitan në Parkun Kombëtar Yosemite, në qershor të vitit 2017.
“Ky film është për të gjithë që besojnë në misionet e pamundura. Është puna e një ushtrie të tërë”, tha Elisabeth Chai gjatë fjalimit të saj gjatë mbrëmjes gala të ndarjes së çmimeve më prestigjoze të kinematografisë./E.M
