Trajneri i Kukësit, Ernest Gjoka, ka evituar të flasë për shfaqjen që u dha sot ndaj Tiranës. Në “Gol pas Goli” ai nuk iu përgjigj pyetjeve për marrëveshje me Tiranën.
“Nuk merrem me ato llafe, çdo njeri ka punën e vet të flasë e të mendojë si do vetë. Më vjen keq që e mendoni, por nuk dua të bëj më replika. Mendoj se nuk është e vërtetë, nuk e di ku mbështeteni që flitni. Nuk i përgjigjem pyetjes që më duket jashtë normales”, tha ai, i pyetur nga paneli në studio. “A ka aleancë? Më vjen keq që e mendoni ashtu se nuk e kam mbledhur ende veten. Isha i shqetësuar se për pak do të më iknin tri pikë dhe nuk do t’i gjeja më”, deklaroi Gjoka. Sipas tij, kjo ndeshje ishte thjesht çështje impenjimi të duhur në momente të caktuara. “Unë mendoj se kam pasur tensionin më të madh gjatë gjithë kohës në këtë ndeshje, e në përfundim të ndeshjes ende nuk e kam mbledhur veten për rastet e shpërdoruara.
Këto janë ndeshje ku ti do të bësh më shumë se duhet dhe kjo mund të kthehet në bumerang. Prandaj themi që ndeshjet duhen vlerësuar, zbatuar që në fillim, të jemi agresivë, të bëjmë gjithçka, të mos i lëmë gjërat të shkojnë vetë. Këtë kërkuam me forcë pas pjesës së parë që të bëjmë gjithçka, pjesa e parë u interpretua jo si duhet, në pjesën e dytë u kërkua gjithçka. Pjesa e parë ishte ajo që më ka tensionuar, nuk ishim ku duhet, ishim të ngarkuar dhe na frenoi për të dhënë atë që duhet. Në mbarim të pjesës së parë ishte kritike shumë e madhe nga ana jonë dhe ngritëm zërin edhe më shumë se na takon për të dhënë maksimumin. Sepse rrezikonim rrugën e objektivit madhor, nuk duhet të flemë gjumë, duhet ta japim gjithçka që në fillim”, ishte komenti i Gjokës./Panorama sport
