Bashkia e Rrogozhinës u fitua nga kandidati i partisë socialiste, Edison Memolla.
Memolla u shpall fitues me vetëm 23 vota diferencë nga kundërshtari Shkëlqim Hoxha, kandidat i koalicionit ‘Bashkë Fitojmë’.
Së bashku me drejtuesin politik të PS për qarkun e Tiranës, Erion Veliaj kanë folur në një dalje për mediat pas fitores, ku sipas tyre Rrogozhina dha një mesazh që duhet bërë më shumë.
Veliaj tha se nuk po shfaqin arrogancë por mesazhi që dha Rrogozhina, do të thotë që të jemi me këmbë në tokë dhe edhe pse jemi votuar me 50 përqind.
“Përfundoi me një fitore me 23 vota, të cilat do të na japin të drejtë të festojmë por jo që të jemi euforik. Ne po e lexojmë shumë qartë mesazhin e Rrogozhinës, me 23 vota është të jesh barazim. Kështu që nuk duam të jemi arrogant, mendjemëdhenj por mesazhi që na dha është që të jemi me këmbë në tokë dhe edhe pse jemi votuar me 50 përqind, duhet t’u shërbejmë 100 përqind qytetarëve. Dua t’i falenderoj me zemër edhe ata që nuk na votuan sepse na dhanë një mesazh që ka ende tensione dhe diferenca mes popullsisë qytetare dhe urbane dhe duhet t’i adresojmë.”
Ndërsa Memolla që fitoi në Rrogozhinë tha se do t’u tregojmë edhe atyre që nuk na votuan që i shërbejmë të gjithë komunitetit të Rrogozhinës pavarësisht rezultatit.
“Pavarësisht se fituam, mesazhin e kemi marrë që të ulim kokën dhe të punojmë më fort. Pas 4 vitesh do të kemi zgjedhje të reja, dhe do t’u tregojmë edhe atyre që nuk na votuan që i shërbejmë të gjithë komunitetit të Rrogozhinës pavarësissht rezultatit.”/Opinion.al
