Kreu i “Demokracisë së re”, Kyriakos Mitsotakis, ka mposhtur rivalin e tij të qendrës së majtë, Alexis Tsipras, në zgjedhjet e së dielës, ndërsa pritet të betohet paraditen e sotme përpara Presidentes greke Katerina Sakellaropoulou.
Pas fitores Mitsotakis është shprehur se ka siguruar një “mandat të fuqishëm” për të ecur përpara në rrugën e ndryshimeve.
Të dielën, Greqia i ka mbajtur zgjedhjet e dyta parlamentare brenda një muaji.
Partia e Mitsotakisit ka fituar 40.5 për qind të votave, pothuajse 23 për qind më shumë sesa partia e Tsipras, Syriza.
Ai e ka mposhtur Syrizan edhe në maj, mirëpo nuk arriti të sigurojë shumicën parlamentare për të formuar i vetëm qeverinë.
“Demokracia e Re është sot partia më e fuqishme e qendrës së djathtë në Evropë”, u ka thënë Mitsotakis mbështetësve të vet në Athinë.
Mitsotakis njihet për rikthimin e stabilitetit në ekonominë e Greqisë dhe menaxhimin e borxheve.
Ndonëse aktualisht shumë grekë vuajnë nga rritja e çmimeve, ata kanë votuar për partinë që ka premtuar taksa më të ulëta dhe përmirësim të shëndetit publik.
Partia e Tsiprasit, Syriza, ka humbur edhe më thellë sesa në zgjedhjet e kaluara, duke fituar rreth 18 për qind të votave.
