Kryetarja e Bashkisë së Urës Vajgurore,Juliana Memaj, është shprehur se procesi i numërimit ka qenë i rregullt dhe se ka dhënë numrin e votave të saj në raport me pjesëmarrjen.
Sipas Memajt në votime kanë marrë pjesë 8026 votues dhe nga këta 7666 kanë votuar për kandidaturën e saj. Ajo shtoi gjithashtu se procesi ka është monitoruar nga vëzhgues të OSBE/ODIHR dhe gjithçka është bërë sipas ligjit
“Rezulton që kandidati i Urës Vajgurore ka fituar 7666 vota të vlefshme, votues 8026. Procesi ka qenë i rregullt sipas ligjit, duke zbatuar çdo nen të Kodit Zgjedhor.Procesi është monitoruar edhe nga OSBE/ODIHR, ka pasur vëzhgues dhe është bërë sipas ligjit” deklaroi Juliana Memaj.
Në Urën Vajgurore, KQZ deklaroi ditën e djeshme se pjesëmarrja ka qenë 19.18% ose 5900 votues. Në këtë bashki rezulton se Juliana Memaj ka fituar me 7666 vota, pra 1766 vota më shumë se numri i votuesve në total. Kjo mospërputhje sipas zonjës Memaj ka të bëjë me ndonjë gabim të bërë nga KQZ.
Ndëkohë që vet kryetari Zguri pak më herët në një deklaratë për mediat tha se raportimet nga komsionerët këtë vit u bënë nëpërmjet telefonit. Ai pranoi se në ndryshim nga zgjedhjet e kaluara, në këto zgjedhje ka pasaktësi. Ai shkoi dhe më tej, teksa deklaroi: “Se çfarë ka ndodhur në rastin konkret, paaftësi ose tregues parregullsie, kjo do të zbulohet me hetim administrativ”. /Opinion.al
