Hektor Mahmutaj, një 43-vjeçar shqiptar, i dënuar me 25 vite burg në mungesë për vrasjen e një fermeri në Shqipëri, arriti të shfrytëzojë lirinë me kusht për t’u zhdukur.
Mahmutaj hyri në Britani i fshehur në një kamion, ku ka jetuar përgjatë këtyre viteve duke përdorur 13 emra të ndryshëm, ndërkohë që në Shqipëri është dënuar në mungesë me 25 vite burg për vrasjen e Gentjan Jahaj, në korrik të vitit 1997.
Në tetor të vitit të kaluar, një gjykatë britanike vendosi që ai të ekstradohej në Shqipëri, dhe pavarësisht se kishte një sërë dënimesh edhe në shtetin britanik, ai u lirua me kusht por sipas mediave britanike Mahmutaj ka shkelur lirinë me kusht dhe është arratisur.
Një deputet konservator, Philip Davies reagoi menjëherë me kritika ndaj sistemit juridik.
“Ky zhvillim thjesht po nënvizon se në ç’farsë është kthyer sistemi ynë i drejtësisë dhe sesa perverse apo idiote janë disa vendime gjyqësore. Njerëzit po vihen në rrezik pa shkak për këtë arsye”, tha ai.
Mahmutaj kundërshton ekstradimin në Shqipëri, pasi sipas tij do të shkelen të drejtat e njeriut, ndërsa është një prej të “shumëkërkuarve” në listën e Interpolit për vrasje me paramendim dhe prodhim e zotërim të armëve luftarake dhe municioneve./Opinion.al
