Ish-kryeministri italian Silvio Berlusconi, i cili u nda sot nga jeta në moshën 86-vjeçare njihet si njeriu që ndryshoi futbollin. Si adhurues i sportit, por jo vetëm, edhe me vizionin si biznesmen ai kreu një revolucion të vërtetë në botën e futbollit.
Berlusconi bleu Milanin në vitin 1986. Fillimisht si president, pastaj si zvendës president, klubi nën drejtimin e tij fitoi në 31 vite 29 trofe (nga të cilët 26 në 20 vitet si President dhe 3 në 11 vitet si zv/president).
Ishte presidenti më jetëgjatë dhe më fitues i historisë së Milanit, ndërsa në total investoi rreth 900 milionë euro te klubi i futbollit.
Ai solli në stolin e kuqezinjve Arrigo Sakin, e më pas ndërtoi një ekip kampionësh me emra të njohur si Ançeloti, Kostakurta, Rud Gulit, Van Basten dhe Rajkard.
Në vazhdim, pjesë e Milanit u bënë futbollistë si Maldini, Nesta, Pirlo, Seedorf, Rivaldo, Shevchenko, Inzaghi dhe Kaka. Në prill 2017 përfundon epoka Berlusconi te kuqezinjtë.
Mes trofeve të shumtë, Milani fitoi 8 herë Serie A, një Kupë të Italisë, 7 Superkupa, 5 Liga Kampionesh, 2 Kupa Ndërkontinentale, një Kupë Bote për Klube dhe 5 Superkupa Evropiane.
Më pas në vitin 2017, Berlusconi e shiti klubin te kinezët. Por pasioni për futbollin vlonte ende.
Në 2018-n ai bleu Monza, skuadër që luante në Serie C dhe së bashku me Gallianin në vitin 2022 arritën ta ngjisnin për herë të parë në histori në Serie A.
