Shkrimtarja Flutura Açka ka replikuar në distancë me Kryeministrin Edi Rama, duke i kujtuar se Gjergj Fishta me të cilin mburresh fliste me “Q”, si gegët që Rama përpiqet sot ti ofendojë.
Kujtojmë se Edi Rama disa herë ka ironizuar veriorët dhe kosovarët duke shkruar enkas “Qadra”.
Shkrimi i Flutura Açkës
Me gjithë respektin e madh që kam sa herë njerëzit e politikës përmendin dhe nderojnë njerëzit e kulturës, jam e detyruar t’i kujtoj kryeministrit tim me këtë postim, se atij i ka shtegtuar e drejta e këtij nderimi.
Fishta, po të ishte gjallë, Çadra do ta shqiptonte Qadra, fjalë me të cilën lëçitësi ynë në fjalë fyu para pak ditësh një qytetar të thjeshtë – që iu ankua për ca punëra që politikani duhet t’i bëjë më mirë – për t’i kujtuar atij se ishte alpin a gegë, varet çfarë i shkakton për shumë shpërvjelje atij. Qadra, është fjalë që përdor gati dy e treta e shqiptarëve, duke përfshirë edhe Kosovën.
Kështu që një kryeministër që përfaqëson të drejtuarit e shtetit në emër të çdo qytetari të thjeshtë, edhe për ata që nuk e kanë votuar, duhet të kafshojë gjuhën kur flet. Sepse nënkuptimi i fjalës Qadër që ka përdorur pa kurrfarë kujdesi, është një racizëm i pastër dhe i papranueshëm.
Unë po të isha politikane në Kosovë, vetëm prej kësaj fjale dhe me shpotitë e shpeshta që u bën alpineve, do ta kisha shpallur Persona Non Grata kryeministrin e Shqipërisë.
Kryeministri ka të drejtë te bëjë politikë sa të dojë, t’i bëjë Pozitë Opozitës me të gjitha armët politike që ia lejon ligji, por jo duke përdorur Fishtën, gjuhën e të cilit e fyu tërthorazi para ca ditësh, sepse është një përdorim i pandershëm dhe hipokrit…
Statusi i Ramës
AMARCORD
Tek sheh këtë foto të mrekullueshme të Pater Fishtës mes urtësisë së gjelbërimit pranveror, shkrepur si sot 90 vite më parë, gjemon jashtë dritareve zhurma e zelotëve apo zelltarëve të dimrit demokratik, të cilët himnin kombëtar e përdorin si kushtrimin e fillimit të punës dikur në kooperativa dhe të cilëve prej kohësh françeskani i madh ua kishte parë hajrin…
“Flamuri kombtar nuk ka ç’ka ban nder ne,
Po kje se dashtni nuk kem’ për Atdhe!
(…)
Pa frymë e tue dihatë vrap ai nget,
Si Krishtin shiti Juda Iskarjot,
Drue Adheu ndër ne po shitet për një zallotë…
A thue mos fola keq?… Po lypi t’falun,
Përse ktu vetë me fue nuk due kërkëndin,
E pse asht mirë fjalën n’zemër t’fryt m’e ndalue,
Por ai, qi të liruem me e pasë s’don vendin,
A prej së tjerëve s’don me ia lshue rendin
A thue ai s’asht Judë? Po, kambë e krye Iskariota!,
E pra kso nipash ka edhe shum Kastriota… ”
