Përpjekja e firmave të nxjerrjes së gurit dekorativ në fshatin Novaj për të nisur punën është bllokuar nga forca të shumta policie dhe FNSH-je. Për këtë arsye pronarët dhe punonjësit e këtyre firmave kanë dalë sot në protestë duke bllokuar aksin nacional Poliçan – Skrapar.
Firmat kërkojnë largimin e policisë dhe hapjen e rrugës për të filluar punën pasi ata e konsiderojnë ndërhyrjen e policisë të jashtëligjshme për sa kohë nuk iu jepet asnjë shkresë zyrtare për arsyen e bllokimit të tyre.
Sipas vendimit të Gjykatës Administrative që rrëzoi VKM-në e qeverisë për shpalljen e malit të Tomorrit “Park Kombëtar” firmat e nxjerrjes së gurit dekorativ duhet të fillonin punën. Por qeveria ka vendosur ti mbajë të bllokuara duke thënë se vendimi i gjykatës do të ankimohet dhe se zona do të shpallet “Park Kombëtar”.
Më herët firmat kishin rënë dakord me drejtorinë e policisë së Beratit që të mos punonin deri më 25 Gusht për shkak të Pelegrinazhit në malin e Tomorrit, por edhe pas përfundimit të kësaj feste ato vazhdojnë të mbesin të bllokuara pa iu dhënë asnjë shpjegim. /Opinion.al
