Presidenti i Real Madrid Florentino Perez ka pranuar se klubi më i pasur në botë blen lojtarë që shesin fanella. Ka qenë sekreti i hapur i suksesit të madh komercial në shekullin e ri por gjatë një interviste të rrallë në Shkollën e Biznesit Columbia, Perez nuk fsheh metodat e Madrid. “Njerëzit e kuptojnë të dukshmen – që ne transferojmë lojtarë të mëdhenj si Ronaldo, Zidane dhe Figo. Por pas lojtarëve ekziston ekuacioni ekonomik sportiv.
Në modelin tonë është e rëndësishme të kuptojmë blerjen e çdo lojtari, duhet të kemi parasysh faktin: sa të ardhura do të gjenerohen?” Presidenti i Madrid, i cili së shpejti do të jetë në ndeshjen e 500-të në krye të klubit, është kritikuar për blerjen e lojtarëve me vlerë komerciale që nuk i duhen ekipit në fushën e lojës.
Ai ka blerë mesfushorin më të mirë anësor David Beckham në 2003 megjithëse Real në atë pozicion kishte Luis Figo. Por vlera e madhe jashtë fushe e Beckham dhe aftësia e tij për të shitur fanella dhe të hapë tregun aziatik bëri që ai të ishte një sukses financiar, megjithëse Real kaloi tre vite pa trofe pasi mbërriti anglezi.
“Në vitin 2000, Real po vuante një krizë të madhe ekonomike. Aq e madhe sa që rrezikonim të humbnim statusin e klubit në pronësi të pjesëtarëve. Por klubi duhet t’i përkasë pjesëtarëve të bordit dhe mos të jetë në pronësi tëv etëm një individi,” vijon Perez. Por blerjet e mëdha jo gjithmonë priten mirë nga trajnerët.
Vitin e kaluar, ish-trajneri Carlo Ancelotti e quajti transferimin e 16 vjeçarit Martin Odegaard si një “lëvizje e marrëdhënieve publike”. Dhe pak ditë më parë një tjetër trajner i së kaluarës së Real Madrid, dora e djathtë e Vicente Del Bosque, Toni Grande, ka sugjeruar se Perez kishte dhënë urdhrin për lënien në stol të Fernando Morientes në finalen e Super Kupës Evropiane në 2002. “Një orë përpara ndeshjes me Feynoord Jorge Valdano erdhi e na tha: ‘Thojini Morientes të mos zhvishet se është transferuar diku tjetër. Është një urdhër i presidentit.” Por ishte blerja e re e brazilianit Ronaldo – i cili zëvendësoi Morientes në ekip – që ndihmoi Real Madrid të kalonte Manchester United në listën e klubeve më të pasur në botë.
