E vetmja shije e hidhur e mbrëmjes madhështore në Cardiff te Real Madrid ishte ajo e provuar nga James Rodriguez, i cili i hidhëruar nga pankina e radhës në ndeshjen më të rëndësishme të sezonit, u ka rezervuar një sjellje të akullt shokëve të skuadrës e mbi të gjithëve, trajnerit Zinedine Zidane. Sinjali i qartë i lamtumirës që është tashmë më pranë se kurrë. Në lidhje me situatën e kolumbian foli pas finales së fituar ndaj Juventus edhe vetë presidenti i Real Madrid, Florentino Perez.
“Do të flasim me trajnerin Zidane, është ai dirigjenti i orkestrës. Nëse do të varej nga unë, do të qëndronin të gjithë. James është një futbollist i jashtëzakonshëm, por kur në skuadër ka kaq shumë… Është Zidane ai që do të vendosë të ardhmen. Sa i përket De Gea’s, ai është një portier që luan te Manchester United. Nuk e di se ku do të jetë sezonin e ardhshëm, nuk jam magjistar”, deklaroi presidenti i klubit Los Blancos, Florentino Perez.
