Një komb i tërë i paralizuar në pritje të një sfide epike. Ndërsa pjesa tjetër e botës vrojton me kureshtje.
Numërimi për “Superklasiken” argjentinase që do përcaktojë fituesin e 59-të të Kupës Libertadores po shkon drejt fundit.
“Akti” i parë mes Boka Zhuniorsit dhe River Plejtit, do të luhet sonte në “Bombonera” (ora 21:00 shqiptare)
Etapa e dytë do luhet në “El Monumental”, më 24 nëntor në po të njëjtin orar.
Derbi më i nxehtë i futbollit, është portreti perfekt i kulturës e traditës së një populli, i cilësuar jo më kot si “ndeshja e shekullit”, “përballja finale” apo “apokalipsi”
Histori dhe rivalitet
“The Guardian” disa vite më parë e përfshiu në listën e dhjetë eventeve për t’u ndjekur së paku një herë në jetë.
Boka-River: një rivalitet që zgjat prej 110 vitesh, ku pasqyrohen edhe ngjarjet historike të Argjentinës dhe një populli që e përjeton si asgjë tjetër.
Nga “Klasikja” e parë e zhvilluar në 1908-ën, kanë pasuar 367 të tjerë (368 në total) mes ndeshjeve zyrtare dhe miqësoreve.
Shifra rekord
Një finale Libertadores mes Bokas e Riverit gjeneron një entuziazëm më të lartë edhe se finalet e Champions-it.
Asnjë event futbollistik në botë, pra, nuk krahasohet me “Superklasiken” argjentinase, jo më kur flitet për një finale të Libertadoresit, ndër të tjera e fundit që do zhvillohet me dy takime.
Një ide krijohet nga shifrat: 1.080 gazetarët e akredituar nga 150 tabloide të 25 vendeve të botës.
Po kështu sfida do transmetohet në 100 shtete, ndërsa çmimet e biletave të rishitura në internet kanë kapur kuotën e rreth 35.000 eurove…
Riveri dhe Boka janë dy skuadrat më të shtrenjta të Amerikës së Jugut.
Boka kushton 110 milion euro ndërsa Riveri 75 milion.
Protagonistët pritet të jenë Kristian Pavon, sulmuesi 22 vjeçar i Bokas (40 milionë euro klauzolë) dhe Ezekiel Palasios, mesfushori 20-vjeçar i Riverit (vlen vetëm 15 milionë).
Në këtë ndeshje pritet të ketë 1.300 agjentë policie dhe rreth 500 kujdestarë e stadiumit që do mbajnë nën kontroll rreth thuajse 300 ultrasit e pranishëm. Për të mos rrezikuar “apokalipsin”, jo vetëm në kuptim metaforik.
