Presidenti francez, Emanuel Makron dhe kancelarja gjermane, Angela Merkel kanë rënë dakord për një marrëveshje mbi një plan 500 miliardë eurosh për vendet më të prekura nga pandemia. Sipas dy fuqive europiane, kjo vlerë nuk do të jetë një borxh, por do të “vilet” nga bilanci ekonomik i vendeve të unionit.
Fondi i rimëkëmbjes, synon lehtësimin e pasojave të pandemisë së koronavirusit në vendet anëtare të BE-së dhe shihet si shprehje e unitetit në kohën kur shumë vende evropiane kanë nisur të rihapin ekonomitë, dy muaj pas izolimit.
Merkel dhe Macron e cilësuan atë si një “hap të madh përpara” dhe thanë se Komisioni Evropian gjithashtu do të lejohet të huazojë më shumë para në tregjet financiare, në emër të Bashkimit Evropian.
Marrëveshja u përshëndet menjëherë nga presidentja e Komisionit Evropian Ursula von der Leyen, por ka ende nevojë për miratimin e të 27 vendeve anëtare të BE-së.
Sakaq, Europa sapo ka filluar të dalë nga masat e izolimit të vendosura për të parandaluar përhapjen e koronavirusit të ri.
Masat që u vendosën në muajin mars kanë shkaktuar dëme ekonomike, dhe Gjermania, si ekonomia më e madhe e BE-së, tashmë ka hyrë në recesion.
Ekonomia e eurozonës në përgjithësi parashikohet të tkurret në 7.7 për qind këtë vit, por dëmi mund të jetë më i keq në Itali dhe Greqi./Opinion.al
