Filmat e dhunshëm ose të frikshëm mund të çojnë në shtim të peshës trupore. Mund të duket e çuditshme por studimi i fundit e ka treguar. Shikimi i filmave të tillë sjellë stres dhe nerva të tendosura, të cilat “luftohen” me ushqime që rritin peshën si çokollata apo patetina.
Një studim i tillë është realizuar nga një Universitet në New York dhe më pas është publikuar në revistën e njohur “Eating Behaviours”. Sipas studimit nuk ndikon shumë koha që kalojmë ulur duke parë një film, por më shumë ajo çfarë ekspozohet në ekran.
Shikimi i filmave që janë komedi romantike ose zhaner të ndryshëm, nuk çojnë të njëjtin impuls në nivelin e emocioneve që çon në konsumimin e një ushqimi jo shumë të shëndetshëm.
Në studim kanë marrë pjesë 84 veta nga mosha 20 deri 30 vjeç të cilëve iu është kërkuar në mënyrë rastësore të shohin një komedi romantike ose një film të dhunshëm.
Para eksperimentit është bërë matja e peshës trupore, rritmit të zemrës, presionit të gjakut dhe gjithashtu niveli i stresit dhe i urisë. Pjesëmarrësve gjithashtu u janë dhënë ushqime të ndryshme si çokollata, kokoshka, patatina, biskota, mollë, lëngje frutash, pije të gazuara etj.
Më pas u është thënë të hanë çfarë të duan si dhe janë lënë vetëm për të parë filmin në mënyrë që të ndiheshin më komod. Pas këtij eksperimenti dolën përfundimet se ata që kanë parë një film të dhunshëm patën një përqindje më të lartë nervozizmi dhe trishtimi. Ndërsa personat që panë një komedi romantike nuk patën ndryshime në gjendjen shpirtërore.
Gjithashtu asnjë ndryshim nuk është vënë re tek dy grupet sa i përket shtimit të oreksit, por grupi që ka parë një film të dhunshëm kanë ngrënë më shumë gjatë transmetimit.
Nga 42 personat që kishte ky grup rreth 62% e tyre kanë ngrënë më shumë se dy produkte që shtojnë peshën dhe 71,4% e tyre kanë konsumuar elemente të kripura./Xh.K/Opinion.al/
