Filmat aksion/horror të preferuarit e shqiptarëve

Filmat aksion dhe horror, janë më të preferuarit nga publiku shqiptar. Xhenis Bengasi menaxhere e videotekës “Sky” thotë se, filmat aksion dhe horror janë nga më të pëlqyerit. “Në pesë vite pune në këtë videotekë, mund të them me bindje se filmat më të dashur për shqiptarët janë ata aksion dhe horror. Meshkujt janë kryesisht ata që preferojnë filmat aksion, ndërsa përsa i përket filmave horror ata ndiqen më shumë nga adoleshentët dhe më bën shumë përshtypje sesi prindërit nuk i kontrollojnë, teksa i shohin këto filma”, thotë Xhenis. Sipas saj filmi “The Shawshank Redemption”, apo “Man on fire”, janë filmat që nuk vdesin kurrë dhe që shihen nga publiku edhe në ditët e sotme. Edhe prurjet e reja  siç është filmi “Focus” me Will Smith apo “The Man from Uncle”, janë disa nga filmat aksion që kërkohen më shumë nga publiku shqiptar. Dramat dhe filmat me ngjarje reale, preferohen kryesisht nga femrat mbi 30 vjeç dhe më i pëlqyeri është “A dangerous method”, me protagoniste kryesore aktoren e famshme hollivudiane, Keira Knightley. Komeditë sipas saj janë ato që ndiqen shumë pak, ndërsa klasikët si “Il capo dei capi” apo “Catch me if u can”, mbeten ende të parapëlqyer për tu parë.