Gol në debutim në ndeshjen e kampionatit si dhe dol në debutimin e tij në ndeshjet e Ligës së Kampionëve. Armando Sadiku tregoi që në ndeshjet e para që është lojtari i duhur për të shndërruar në gola aksione aspak premtuese te Legia.
Mirëpo, starti negativ i kampionëve në fuqi ka bërë që në Poloni të merren edhe me emrin e bomberit të Kombëtares. Pa marrë parasysh faktin që është një lojtar i ri në atë ekip dhe i duhet disa ditë kohë që të ambientohet, Sadikut i kanë faturuar edhe eliminimin e Legias nga Champions-i, ndonëse gol i shqiptarit në ndeshjen e transfertës e mbajti Legian në lojë edhe për sfidën e kthimit. “Sadiku nuk është në lartësinë e duhur. Nuk më bind aspak”, ka deklaruar Kazimierz Uergrzyn, ish-mbrojtës i Kombëtares polake që tashmë është në rolin e komentatorit dhe analistit sportiv në mediat vendase. Pak ditë më parë, disa nga mediat në Poloni, gjatë analizës për ndeshjet e Champions-it nënvizonin se Legias i ka munguar loja e mesfushorëve anësorë për të furnizuar sulmin.
