Mjeku infeksionist Pëllumb Pipero është shprehur sot se ky është “fillimi i fundit” sa i përket situatës së koronavirusit në Shqipëri dhe se “kjo histori mund të mbyllet nga fundi i muajit qershor”.
Në një intervistë telelvizive, mjeku theksoi se duhet të kemi kujdes dhe nënvizoi faktin se gjendja e Shqipërisë varet edhe nga ajo në rajon.
“Duhet që të vazhdojmë që të kemi shumë kujdes. Unë e kam thënë se me uljen e personave të prekur, masat do të ngadalësohen. Ky është fillimi i fundit. Kjo histori mund të mbyllet nga fundi i qershorit. Duhet modeomos që gjithë rajoni të jetë i qetë që edhe Shqipëria të jetë e qetë.
Shkenca po punon. Ndoshta mund të kemi edhe vaksinën, ndërsa temperaturat do jenë në favor të luftimit të koronavirusit. Nëse ndodh që ky virus të kthehet prapë, bota është më e mësuar. Këtë herë kishim pasoja rrënuese”, tha Pipero.
Pipero u shpreh gjithashtu se virusi nuk është në ajër, por përhapet me anë të kontakteve.
“Nuk mund të themi që nuk mund të kalojmë këtu apo jo. Virusi vjen tek ne përmes kontakteve të afërta dhe nuk është në ajër. Prandaj, shmangia e kontakteve është e rëndësishme. Të shmangim kontaktet. Sidomos të sëmurët kronikë duhet të kenë shumë kujdes.
Masat janë të nevojshme që të respektohen, pasi përndryshe mund të infektohemi. Kjo është periudha më e rëndësishme për të luftuar Covid-19”, u shpreh Pipero. /Opinion.al
