Presidenti Trump deklaroi se Sekretari amerikan për Energji, Rick Perry, një figurë e rëndësishme në bisedimet e Trumpit me zyrtarë të Ukrainës, do të largohet nga posti që mban në fund të vitit.
Teksa ka bërë këtë njoftim, Trump ka thënë se ai do të nominojë pasardhësin e Perryt shumë shpejt, ndërsa pranoi se tashmë e ka gjetur atë.
“Ne tashmë kemi zëvendësuesin e tij. Rick ka bërë një punë fantastike. Mirëpo ishte koha”, ka thënë Trump.
Ky largim pason një varg ndryshimesh të figurave të larta qeveritare, që administrata amerikane ka nisur në janar të vitit 2017 gjatë presidencës së Trump.
Kujtojmë se demokratët në Dhomën e Përfaqësuesve i kanë nisur Perryt një kërkesë për intervistim, në kuadër të hetimeve që po kryejnë për shkarkimin e presidentit Trump. Atij do t’i kërkohet të sqarojë përfshirjen e tij në bisedën mes Trumpit dhe homologut të tij ukrainas, Volodymyr Zelenskiy më 25 korrik.
Trump ka thënë më herët se Perry e kishte shtyrë atë të realizonte telefonatën, në të cilën presidenti i ka kërkuar homologut ukrainas të hetojë rivalin demokrat, Joe Biden dhe djalin e tij, Hunter, i cili ka qenë në bordin e një kompanie gazi në Ukrainë.
Sipas Kushtetutës amerikane, Dhoma e Përfaqësuesve ka fuqi për të shkarkuar presidentin për “shkelje të rënda dhe keqbërje”, por deri më tani, asnjë president nuk është shkarkuar përmes këtij procesi./Opinion.al
